Түркия президенті Режеп Тайып Ердоған G20 көшбасшыларының Сауд Арабиясы мен Израиль арқылы Үндістаннан Еуропаға көлік дәлізін салу туралы бастамасын сынға алды, деп хабарлайды Egemen.kz News Israel ақпараттық порталына сілтеме жасап.
Режеп Тайып Түркия көлік дәлізін салу жобасында болмаса, бұл жобаны жүзеге асыру мүмкін емес деп отыр.
Аталған жоба Үндістан мен Біріккен Араб Әмірліктері арасындағы қарқынды тасымалдау байланысын қамтамасыз етеді. БАӘ-нің өзі трассаның ең қиын учаскесі – трансшекаралық теміржолдың бастамасы болмақ. Бұл желі БАӘ, Сауд Арабиясы, Иордания және Израиль аумақтары арқылы өтеді.
Түркияны құрамға қосу қиындық туғызып отыр. Себебі бұл ел мен Үндістанның арасында Ауғанстан, Иран, Ирак, Сирия сияқты мемлекеттер бар. Алайда әзірге тек өзара түсіністік туралы меморандумға қол қойылды. Жоба әлі іске асыруға дайын емес. Оған Африка елдері де қатыспақ, бірақ оңтүстікке баратын жолдың қандай болатыны әлі белгісіз.
Таяу Шығыстағы теміржол АҚШ пен Сауд Арабиясы арасындағы болашақ мәміле бойынша келіссөздер жүргізудің бір себебі болуы мүмкін, оның ішінде Израиль де оның бөлігі болады.